Palkein meri, dagaa de jaati hain!!!

Nazrein teri jab dekhein mujhe, palkein meri jhuk jaati hain,
Her pal tujhe dekhne ki tamanna, dil he mein reh jaati hai,
Yeh palkein bhi, dagaa de jaati hain...

Jab bhi teri baat chhide, sakhiyaan mujhe chidhaati hain,

Chehre per halki muskaan, aur palkein sherm-saar ho jaati hain,
Yeh palkein bhi, dagaa de jaati hain...

Jab bhi teri awaaz sunu, dhadkane badh jaati hain,

Palkein meri uthker tujhe, dekhne se katraati hain,
Yeh palkein bhi, dagaa de jaati hain...

Jab bhi auron ki tareef, tere labon per aati hai,

Dil mein koi dard utha, aankhein yahi batlaati hain,
Yeh palkein bhi, dagaa de jaati hain...

Jab shyam dhale aur deed ko tere, meri nazrein paana chahti hain,

Bina neend aankhon mein liye, palkein band ho jaati hain,
Yeh palkein bhi, dagaa de jaati hain...

Jab bhi tera rukh karun, ke aaj suna doon dil ki baat,

Nakaam koshish per meri, palkein nami chalkaati hain,
Yeh palkein bhi, dagaa de jaati hain...

Jab bhi aisa hota hai her baat khatm ho jaati hai,

Agle din phir deed per tere, ek aas nahi bandh jaati hai,
Yeh palkein bhi, dagaa de jaati hain...

Phir palkon mein khwabon ki, baraat nayi saj jaati hai,
Phir tujhe apna banane ki ummeed hamein mil jaati hai,
Yeh palkein bhi, dagaa de jaati hain...
Yeh palkein bhi, dagaa de jaati hain...

Aajkal...!!!

Aajkal... kisi se nazrein milane se derta hai dil,
kahin tujhe meri aankhon mein pehchaan na le koi...

Aajkal... kisi ko pukarne se derta hai dil,
kahin tera naam, jaan na le koi...

Aajkal... mehfilon mein shareekh hote nahi hain hum,
tere deed per meri khushi, bhaanp na le koi...

Aajkal... her kisi ki tammanayen suna kerte hain hum,
kahin khuda se tujhe, maang na le koi...

Aajkal... yeh hawayein bhi meri zulfein nahi bikhrati,
kahin tujhse pehle inhein, sanwaar na de koi...

Aajkal... meri nazron ka tujhe dhundhna gar dekh le koi,
kaise mujhe deewani, maan na le koi...

haan aajkal... bas yuhin aajkal...
na jaane kyun, kuch he dino se, Aajkal...

Meanings:
deed: deedar
bhaanp: pehchaan
gar: agar, yadi

comments : Technology.People.Fun.: आजकल - A Poem